116 mótmælisfólk deyð í Iran

116 fólk eru deyð í mótmælum móti prestastýrinum í Iran, sum nú hevur vart í meira enn tvær vikur. Tað sigur mannarættindastovnurin Human Rights Activists News Agency, stytt HRANA, sambært danska kringvarpinum, DR. 

Fólk byrjaðu at mótmæla í Iran, eftir at iranska gjaldoyra, rialurin, fall sera nógv síðst í desember, men alsamt fleiri mótmæli eru nú móti prestastýrinum í fleiri enn 100 býum í Iran. Fólkið í Iran hevur eisini verið uttan internetsamband í 60 tímar, sigur stovnurin Netblocks. 

Amerikanski forsetin, Donald Trump, hevur alment víst mótmælisfólkunum sín stuðul og heuvr hótt prestastýrið við at leggja uppí, um stýrið drepur mótmælisfólk. Hvítu Húsini hava sagt, at tey fara at raka stjórnina "sera hart", um hon drepur friðarligar mótmælisfólk, skrivar Reuters. Tað hevur øst politikkarar í landinum og formaðurin í iranska tinginum, Mohammad Bagher Ghalibaf hevur hótt USA og Ísrael við álopum, um USA loypir á Iran. Amerikanski herurin og Ísrael eru ”lóglig mál”, segði hann í røðu í tjóðartinginum, sambært AP-tíðindastovuni.