- Eg bleiv nokkso paff

Ársins leiðari á almenna økinum gjørdist í ár Jóhanna á Tjaldrafløtti, sum er skúlastjóri á húsarhaldsskúlanum í Klaksvík, sum nú eitur Rótin.
Hon hevur staðið á odda fyri skúlanum síðan 1995, og hevur leitt stovnin gjøgnum nógvar broytingar hesa tíðina. Ikki minst flytingina úr gomlu sethúsunum í nýggja stáslliga bygningin, sum skúlin nú húsast í.

Starvsfólkahópurin er tvífaldaður seinasta árið og næmingatalið økt, og við hesum broytast arbeiðsumstøðurnar, men okkurt broytist ikki.

- At vera skúlastjóri eitt sovorðið stað er at kalla eitt lívsstarv, og tú mást tíma tað ordiliga væl, sigur Jóhanna á Tjaldrafløtti og leggur dent á, at tú ikki rekur ein slíkan skúla einsamøll, tí uttan góð starvsfólk gerst einki, so heiðurin eiga øll fólkini í húsinum.

Seinastu árini hava ommubørnini ikki sæð nógv til Jóhonnu, tí tá hon ikki hevur undirvíst í skúlanum, hevur hon fyrireikað bygging av nýggjum skúla, innflyting og arbeitt við hugskotum um at gagnnýta umstøðurnar í nýggja skúlanum.

Nógv av hesum hugskotum snúgva seg um mat og matgerð, tí sjálvt um hon er leiðari, so brennir hon enn fyri at læra tey ungu um góðan mat og matvanar.