KAF er ikki við í semjuni um lønarkarmin

Kommunala Arbeiðsgevarafelagið verður ikki partur av lønarkarminum, sum 12 fakfeløg á almenna arbeiðsmarknaðinum og Lønardeildin hjá Fíggjarmálaráðnum fara at undirskriva nú um hálvan tíma, klokkan hálgun fýra, í Tinganesi.

Vit nevndu í tíðindunum á døgurða, at eftir ætlan skuldi Kommunala Arbeiðsgevarafelagið vera við í avtaluni og skriva undir, men nú váttar Per Martin Gregersen, formaður, at Kommunala arbeiðsgevarafelagið verður ikki við.

Hann vil ikki enn gera viðmerking til, hví Kommunala Arbeiðsgevarafelagið ikki er við.

Hava samráðst síðani desember

Ein serfrøðingabólkur gjørdi grundarlagið undir samráðingunum um lønarkarmin, og partarnir hava samráðst síðani tíðliga í desember í fjør.

Tey 12 fakfeløgini eru Starvsfelagið, Akademikarafelagið, Búskapar-  og løgfrøðingafelagið, Yrkisfelagið, Kost- og føðslufelagið, Farmakonomfelagið, Yngri læknar, Ljóðsmøðrafelagið, Fysioterapeutfelagið, Pharmadanmark, Heilsurøktarafelagið og Føroya tekniska lærarafelag.

Lønardeildin hevur sáttmálar við 30 fakfeløg.