Vil hoyra frá tilflytarum og teirra børnum

- Stórur dentur verður lagdur á tey vaksnu. Eg síggi, at vit hoyra minni frá teimum, sum tosa um børnini hjá tilflytarum, sum koma higar, sigur Vilhelm Bergsson, sum lesur samfelagsvísindi og stjórnmálafrøði á Fróðskaparsetrinum.

Vilhelm Bergsson hevur í lestrartíðini havt ein serligan áhuga fyri tilflyting og integratión. Tí hevur hann eisini fylgt væl við, nú nógv kjak hevur verið um júst tað.

Kjakið hevur eitt nú snúð seg um útlendingalógina, sum ikki var dagførd, áðrenn snarskipanin var sett í verk í 2021.

Tann skipanin hevur til endamáls at gera tað smidligari at fáa arbeiðsloyvi í Føroyum hjá fólki úr triðjalondum, t.e. uttan fyri Evropa. Hetta hevur av álvara økt um tilflytingina til Føroya.

Kortini hevur ikki verið hugsað nógv um, at nógv teirra hava vónir um at fáa eitt varandi uppihaldsloyvi, sigur Vilhelm Bergsson. Tað vísir ein kanning, sum hann hevur gjørt í sambandi við lesnaðin, har hann tosaði við tilflytarar, sum arbeiða á Bakkafrosti.

- Eg haldi tað vera umráðandi, at teirra sjónarmið koma fram, sigur Vilhelm Bergsson, sum í sínari master-verkætlan nú fer at tosa við tilflytarar og børn teirra.

Hoyr innslag í útvarpstíðindunum: