Suðuroyartunnilin: Fíggjarnevndin vil hava broytingar

Álitið í løgtingsmálinum um at fyrireika, prosjektera og bjóða út Suðuroyartunnilin er nú lagt fyri løgtingið.

Fíggjarnevndin er at kalla samd um at mæla løgtinginum til at samtykkja uppskotið, við størri og smærri broytingum.

Tó tekur Miðflokkurin støðu í tingsalinum.

Eyðgunn Samuelsen

Gerast í samstarvi við Umhørvisstovuna

Meirilutin í fíggjarnevndini - umboðini hjá Javnaðarflokkinum, Tjóðveldi og Framsókn - mæla løgtinginum til at samtykkja lógaruppskotið.

Í sínum viðmerkingum vísir meirilutin á týdningin av at taka atlit til náttúru og umhvørvi. 

Tí skal skipan av vegaføringini í Djúpadali, skipan av tunlinum gjøgnum Traðarhamar, vegaføringin eystan fyri Sandsvatn, umframt skipanin av vegaføringini í Sandvík og Hvalba, gerast í samstarvi við náttúrufyrisitingina á Umhvørvisstovuni og lokalu myndugleikarnar á staðnum.

Samgongumeirilutin hevur tí eitt broytingaruppskot, har hesar ásetingar verða settar inn í lógaruppskotið, tá tað kemur til 2.viðgerð.

Samgongumeirilutin í fíggjarnevndini tekur ikki undir við at kanna nærri alternativu linjuføringina, ið privati tunnilsbólkurin skjýtur upp, ta sonevndu Múlaleiðina.

Beinir Johannesen

Frítekst tagging: 

Beinir Johannesen

Fólkaflokkurin

Bjarni Árting Rubeksen

Andstøðan hvør sítt álit

Teir tríggir andstøðuflokkarnir í fíggjarnevndini hava hvør sítt álit.

Beinir Johannesen úr Fólkaflokkinum mælir til, at tunnilsfelagið í sínum fyrireikingararbeiði er í tøttum samstifti við avvarðandi kommunur - tað eru Sands, Húsavíkar og Hvalbiar kommunur - um at finna loysnir, tá vegaføringar í kommununum skulu kortleggjast.

Eisini mælir Beinir Johannesen til, at føroyskar fyritøkur í størst møguligan mun sleppa upp í part. Tí mælir hann til, at samlaða verkætlanin verður - har tað ber til - boðin úr í pørtum, so føroyskar fyritøkur og arbeiðsmegi kunnu fáa lut í verkætlanini. 

Beinir Johannesen tekur annars undir við lógaruppskotinum og mælir tinginum til at samtykkja tað.

Magnus Ramussen

Alternativa farleiðin betra loysnin

Magnus Rasmussen, fíggjarnevndarlimur fyri Sambandsflokkin, sigur í sínum minnilutaáliti, at alternativa farleiðin - tann sum privati tunnilsbólkurin mælir til - er avgjørt betra loysnin til undirsjóvartunnil til Suðuroyar.

Tí, sigur Magnus Rasmussen, hevur løgtingið skyldu til at fyrireika og prosjektera ta bestu linjuføringina, sum eisini gevur bestu samfelagsnyttuna. Tað er tann alterantiva farleiðin, og tað er tí henni, vit eiga at fara eftir.

Magnus Rasmussen hevur tí eitt broytingaruppskot, har tað í lógaruppskotinum kemur at standa, at alternativa linjuføringin skal kannast, prosjekterast og bjóðast út.

Steffan Klein Poulsen

Frítekst tagging: 

Steffan Klein Poulsen

Bjarni Árting Rubeksen

Miðflokkurin

Djúpadalsleiðin tann besta

Triði minnilutin, Steffan Klein Poulsen úr Miðflokkinum, sigur í sínum minnilutaáliti, at løgtingið er farið alt ov djúpt niður í smálutirnar í hesum máli.

Løgtingið eigur ikki at taka støðu til annað, enn um vit skulu fyrireika ein Suðuroyartunnil, og um so er, hvør linjuføring veljast skal. 

Steffan Klein Poulsen er sannførdur um, at linjuføringin, sum P/F Suðuroyartunnilin mælir til, er tann besta.

Djúpadalsleiðin passar best til fíggjarliga partin og trygdina, og jarðfrøðin sær eisini góð út. 

Múlaleiðin hevur - heldur tingmaðurin - eina størri nyttu fyri brúkaran, tá ið tunnilin verður tikin í brúk, við tað at samlaða farleiðin verður styttri. Men her fylgja størri óvissur við, tá sjálv verkætlanin skal fremjast, skrivar Steffan Klein Poulsen.

Av øðrum politiskum ávum - tað eru viðurskiftini millum Miðflokkin og løgmann - sigur Steffan Klein Poulsen, at Miðflokkurin tekur støðu til málið í tingsalinum.

Les alt álitið her.

Uppskotið um Suðuroyartunnilin kemur til aðru viðgerð í tinginum mánadagin, og tá verður eisini atkvøtt í málinum.