Rokmikil fundur við baklandið hjá Javnaðarflokkinum

Í morgin koma tvey stórmál hjá samgonguni til viðgerðar í tinginum.

Fyrst á skrá er málið um at hækka pensjónsaldurin, síðani er málið um at projektera og bjóða út Suðuroyartunnilin.

Hóast samgongan ferð eftir ferð hevur sagt, at málini ikki hanga saman, er tað eyðsæð, at tey er tengd at hvørjum øðrum, á tann hátt, at verður málið um at hækka pensjónsaldurin ikki samtykt, hongur samgongan og málið um Suðuroyartunnilin í klønum táð. 

Ruth Vang hevur fyrr sagt, at skal Suðuroyartunnilin samtykkjast, skal málið um hækkaðan pensiónsaldur samtykkjast eisini.

Í vikuni boðaði Liljan Weihe, tingkvinna fyri Tjóðveldi frá, at hon tekur støðu um pensjónsmálið í salinum. 

Tað vil siga, at vandi er fyri, at málið um pensjónsaldurin kann fella, um ein samgongulimur aftrat atkvøður ímóti. 

Hetta er greitt, tí andstøðan atkvøður ikki fyri at hækka pensjónsaldurin. 

Ingilín D. Strøm hevur fyrr verið rættiliga greið um, at arbeiðsvikan skal styttast, men tað málið er lagt til viks. 

Tann 17. december í fjør legði hon áherðslu á, at hon góðtekur ikki at lyftið um styttri arbeiðsviku verður slept. Og hon valdi orðaskiftið um pensjónsaldur at undirstrika, at hon góðtekur heldur ikki niðurstøðuna hjá sínum egna formanni, um at eingin undirtøka er fyri tí.

Framsókn hevur sum nevnt tengt uppskotið um pensjónsaldur saman við uppskotinum um Suðuroyartunnil. Ingilín D. Strøm kom hendan dagin í tinginum ikki við einari slíkari hóttan um 37-tíma arbeiðsvikuna, men hon legði dent á, at stytt arbeiðsvika og hækkingin av pensjónsaldrinum skulu fylgjast at.

 Aksel V Johannesen hevur ikki ráð til at fleiri samgongulimir atkvøða ímóti samgonguni í pensjónsmálinum, um Liljan Weihe velur at atkvøða blankt ella ímóti at hækka pensjónsaldurin í morgin. 

Fyri at binda um heilan fingur kallaði løgmaður flokksleiðsluna saman í gjár.

 
Hetta fyri at tryggja sær, at hann hevur uppbakning frá baklandinum. 

Men á fundinum vóru fleiri ikki sørt ørkymlaði, tí á fundinum skuldu tey atkvøða um, hvat tingfólkini hjá Javnaðarflokkinum skulu atkvøða á málinum um Suðuroyartunnlin og pensjónsaldurin. 

Hetta var ikki fráboðað áðrenn og haraftrat vóru málini tengd saman, soleiðis at tú antin segði ja til bæði ella nei til bæði. Heldur ikki var møguligt at atkvøða dulnevnt, so skuldi tú ganga ímóti løgmanni, mátti tú traðka fram og gera tað opið. 

Av tí at fólk ikki vistu áðrenn fundin, at tey skuldu atkvøða, var tað heldur tilvildarligt hvør var møttur. 

Nógvir suðuroyingar vóru møttir og bæði limir og varalimir atkvøddu fyri málinum, meðan eitt nú sandoyggin nærmast ikki var umboðað.

Fundurin var rokaligur og ørkymlandi siga keldur sum kringvarpið hevur tosað við.

Vit royndu at fáa orðið á løgmann til tíðindasendinga kl 18, men tað eydnaðist ikki.