Fyrsta við svørtum belti

Sanna Nolsøe Djurhuus hevur skrivað føroyska judosøgu sum fyrsta føroyska kvinnan við svørtum belti.

 - Tú byrjar við hvítum belti, og so arbeiðir tú teg upp ígjøgnum ymiskar litar, tekur ymsar royndir, og tá tú so hevur tikið svarta beltið, er tað beltið, sum tú ert í restina av lívinum, so tað er nokkso stórt, sigur hon.

Hetta er ein merkisdagur fyri Judo Føroyar, heldur formaðurin, Petur Sigurð Johannesen, og Sanna Nolsøe Djurhuus ætlar, at fleiri kvinnur skulu røkka svarta beltinum.

 - Fyri meg merkir tað kanska, at eg fegin vil, at fleiri kvinnur røkka sama máli, um tær seta sær sjálvari sama máli. Eg kundi gott hugsað mær, at tá gentur og kvinnur koma til venjing, síggja tær eitt svart belti og hugsa: "Hatta ætli eg mær eisini", sigur Sanna Nolsøe Djurhuus.