Stóru bygdirnar hava einki valevni

Stóru bygdirnar hava einki valevni.

160 fólk stilla upp til løgtingsval hesa ferð, men einki valevni hevur skrásettan bústað í størri bygdum sum Hvalba, Kvívík, Sumba og Viðareiði.

Nógv flestu valevni hava skrásettan bústað í Havn. 74 valevni búgva í Havn, Hoyvík og á Argjum, umframt eitt valevni á Hvítanesi.

Tað skriva valurslit.fo

628 fólk í Hvalbiar kommunu

628 fólk búgva í Hvalbiar kommunu, sum fevnir um bygdirnar Hvalba, Nes og Sandvík. Í Hvalbiar kommunu er einki valevni hesa ferð.

Í Viðareiðis kommunu, sum telur 333 fólk, er heldur einki valevni, og í Kvívíkar kommunu er eitt valevni, sum hevur bústað á Stykkinum, men einki valevni hevur bústað í Kvívík. Í Kvívík búgva meira enn 400 fólk.

Einki valevni hevur bústað í Sumba hesa ferð, men eitt valevni býr á Økrum, sum er partur av Sumbiar kommunu.

Tað eru annars færri og færri, sum stilla upp til løgtingsval, skriva valurslit.fo.

Minni áhugi at stilla upp

Tá Føroyar vóru skipaðar í eitt valdømi til løgtingsvalið í 2008, løgdu flokkarnir seg eftir at savna ein størri part av atkvøðunum hjá einstøkum valevnum, og tølini siga, at tað hevur ávirkað hugin at stilla upp.

Í 1998 vóru 272 valevni. Í 2026 eru tey sum nevnt 160. Tað er ein minking upp á góð 41 prosent.