Talv: Hans Kristian bjóðar av

Høgni Egilstoft Nielsen úr Sandavágs Talvfelag og Hans Kristian Simonsen úr Kollafjarðar Talvfelag eru fremstir við fullum stigatali eftir tvey umfør í FM-einstaklingakappingini í talvi.

Favoritturin Høgni Egilstoft Nielsen vann aftur í gjár. Í drúgvum leiki vant hann spakuliga úr Martini Poulsen, ið annars stóð væl við hvíta fólkinum, skrivar Talvsamband Føroya.

Fyrrverandi føroyameistarin frá 2002, Hans Kristian Simonsen, hevur somuleiðis fingið eina flúgvandi byrjan. Í gjár syfti hann Eliasi Petersen í stórum stíli. Kongaálop, rókaoffur, síðani varð kongurin rikin um alt borðið til hann at endanum varð settur skák og mát. Slíkt sæst sjáldan nú á døgum.

Jón í Horni Nielsen hevur hálvtannað stig á triðja plássi. Tað var um reppið, at hann aftur vann í gjár, men tað eydnaðist Peturi Gardar Magnussen at bjarga sær remis við ævigum skáki.

Í fjórða talvinum vann Luitjen Akselsson Apol trygt á Flóvini Matras Tummarson.

Støðan í Landsliðsbólkinum eftir tvey umfør:

1-2. Høgni Egilstoft Nielsen (ST) 2 stig
1-2. Hans Kristian Simonsen (KT) 2
3. Jón í Horni Nielsen (ST) 1½
4-5. Elias Petersen (HT) 1
4-5. Luitjen Akselsson Apol (HT) 1
6. Petur G. Magnussen (HT)1
7-8. Martin Poulsen (HT) 0
7-8. Flóvin M. Tummasarson (HT) 0

3. umfar, 30. mars

Høgni Egilstoft Nielsen - Elias Petersen
Hans Kristian Simonsen - Jón í Horni Nielsen
Luitjen Akselsson Apol - Martin Poulsen
Petur G. Magnussen - Flóvin M. Tummasarson