Artemis II komin heimaftur

Beint eftir klokkan 1 í nátt okkara tíð lendi Orion-rúmdarfarið í Kyrrahavinum tætt við Kalifornia í USA.

Artemis II-missjónin byrjaði 1. apríl beint áðrenn midnátt okkara tíð, tá SLS-rakettin varð skotin avstað við Orion-rúmdarfarinum, ið manningin hevur doypt Integrity. Astronautarnir eita Reid Wiseman, Victor Glover, Christina Koch og Jeremy Hansen.

Fyrstu ferð síðan 1972
Tað merkisverda við missjónini er, at hetta er fyrsta mannaða mánaferð síðan desembur 1972, tá Apollo 17 var á Mánanum.

Artemis-programmið hevur sum endamál at fáa menniskju aftur til Mánan, og tilsamans fimm missjónir eru ætlaðar, sum stigvíst eru torførari og meiri krevjandi.

Artemis I var ein ómannað missjón í 2022, sum fór til Mánan og í ringrás um hann í umleið 6 dagar, og síðan aftur til til Jarðar.

Artemis II er tann missjónin, sum júst er endað. Hon byrjaði 1. apríl og vardi í 10 dagar. Hon skuldi til Mánan, aftur um hann, og síðan aftur til Jarðar. Á vegnum hava tey so gjørt mátingar og eygleiðingar av ymsum slag.

Til Mánan
6. apríl kom rúmdarfarið til Mánan og fór einaferð aftur um hann, sæð frá okkara sjónarhorni. Tá mistu tey sambandið við Jørðina í umleið 40 minuttir, men komu afturíaftur hinumegin í øllum góðum.

Eina løtu var Artemis II 406.711 kilometrar frá Jørðini, sum er longri burtur, enn nakað menniskja hevur verið fyrr.

Ferðin heimaftur
Og síðan aftur til Jarðar. Á vegnum fekk rúmdarfarið størri ferð, orsakað av tyngdarmegini hjá Jørðini, og hægsta ferðin var 39.688 km um tíman.

Sum væntað misti Artemis II radiosambandið í 4 minuttir í sambandi við, at farið kom inn atmosferuna aftur.
Men tað gekk alt eftir ætlan.

Fallskíggjar vórðu útloystir, og Integrity lendi í Kyrrahavinum millum San Diego og Hawaii kl. 7 munittur yvir 1 í nátt okkara tíð. Og Artemis II-missjónin er endað.

Sum sagt eru fleiri missjónir ætlaðar.

Artemis IV, sum er sett til tíðliga í 2028, er ætlað at lenda á Mánanum. Og Artemis V, sum er sett til seint í 2028, er ætlað at byrja upp á eina basu á Mánanum.