Undran um landsliðsvenjarasetan hjá Fimleikasambandinum

Til oyggjaleikirnar í fjør vann føroyska fimleikalandsliðið heili 15 gull, átta silvur og seks bronsur.

Nú hevur Føroya Fimleikasamband kunngjørt nýtt venjaratoymi fram móti Betri Oyggjaleikum í 2027. Men Camelia Mihaela Mindricel, sum leiddi kvinnulandsliðið til besta oyggjaleikaúrslitið nakrantíð, er ikki partur av nýggja landsliðsarbeiðinum.

Tað vekir undran í Havnar Fimleikafelag, har Camelia er venjari til dagligt.

Camelia Mihaela Mindricel venur fleiri av teimum fimleikarunum, sum manna føroyska kvinnulandsliðið í dag, og sum stóðu fyri fleiri av teimum stóru føroysku úrslitunum á Oyggjaleikunum í fjør.

Anna Margit Dalsgaard, samskipari í Havnar Fimleikafelag, heldur, at okkurt er gingið galið millum Cameliu og Fimleikasambandið, men hon stúrir fyri, at kjakið um venjarasetuna kann fáa týdning fyri fimleikararnar, sum vilja royna seg á hægri støði.

Sambært ársfrágreiðingini fyri 2025 hjá Fimleikasambandinum, er aðalmálið at lyfta stigið hjá bæði fimleikarum og venjarum. Men í Havnar Fimleikafelag vísa tey á, at amboðsfimleikur á hesum støði krevur stórt álit millum íðkara og venjara.

Anna Margit hevur tí eina greiða áheitan á Fimleikasambandið um at finna eina loysn.

Kringvarpið hevði ætlanir um at hava Pól Esper Hansen, formann í Føroya Fimleikasambandi, í sjónvarpsstovuni til viðmerkingar, men hann bar seg undan.

Sí innslag í Degi og Viku her: