Týskur miðil sendir Óla Mittún til Magdeburg

Magdeburg er áhugað í at keypa føroyska stjørnuskotið Óla Mittún frá GOG.

Tað skrivar týski ítróttamiðilin Sport Bild.

Sambært miðlinum hevur stóra týska hondbóltsfelagið hugt at landsliðsstjørnuni í longri tíð og vil hava 20 ára gamla føroyingin til Týsklands í 2027. 

Venjarin hjá Magdeburg, Bennet Wiegert, dylir ikki fyri, at honum dámar føroyska bakspælaran. 

 - Hann er ein spælari, sum hevði riggað til øll liðini í Bundesliguni. Hansara yrkisleið kann uttan iva leiða hann til Týsklands fyrr ella seinni. Um tað verður Magdeburg, má tíðin vísa, sigur Magdeburg-venjarin sambært Sport Bild.

Magdeburg hevur vunnið týska meistaraheitið tríggjar ferðir og við javnleiki ella sigri á Flensburg-Handewitt í kvøld, kann felagið endurvinna meistaraheitið, sum Hákun West av Teigum og Füchse Berlin vunnu í fjør.