Vit vóru ikki bangin

Samkoman Oasan hevur savnað pening inn frá føroyingum kring alt landið, sum verða nýttir til hjálpararbeiði í Ukreina, og í hesum sambandi fóru syskini Edith og Jóhan Petur Johannesen yvir at eygleiða, hvat pengarnir vóru brúktir til.

- Vit fóru við bussi úr Pólandi og búðu hjá privatfólki, tá vit komu til Kiev, greiða tey bæði frá, og leggja afturat, at sjálvt um tey vóru eitt sindur bangin, tá tey komu, so hvarv óttin rættiliga skjótt, tá tey sóu, hvussu róligir íbúgvarnir í ukreinska høvuðsstaðnum vóru.

Við sær høvdu Jóhan Petur og Edith pengar, sum kundu brúkast til at keypa mat til teirra sum tørvaðu, og so vitjaðu tey eisini fólk, sum longu høvdu fingið hjálp.

Felagsskapurin, sum Oasan samstarvar við, hevur bygt fleiri enn 350 smáhús, sum kunnu koma skjótt upp at standa, tá fólk missa hús og heim í krígnum.