Lívfiskastøð umhvørvisgóðkend

Lívfiskastøðin hjá Bakkafrost Freshwater í Svínoy hevur fingið umhvørvisgóðkenning. 

Gamla rognkelsisstøðin er umbygd til lívfiskastøð.

Ætlanin er at ala lívfisk og framleiða rogn. 

Sambært umsóknini vera 2.500 smolt flutt frá lívfiskastøðini við Áir til lívfiskastøðina í Svínoy. 

Tvey ár seinni vera 1.000 fiskar, sum væntandi viga okkurt um 12 kilo í miðal, fluttir til búning í feskvatnskør. 

Tá kvennfiskarnir eru búnir, vera teir stroknir, og 10 milliónir ógitin rogn vera flutt til lívfiskastøðina við Áir.

Avgerðin um umhvørvisgóðkenningina kann kærast til landsstýriskvinnuna í umhvørvismálum. 

Freistin er 2. juli.