Barði liggur enn í Havn

Íslendska uppsjóvarskipið Barði, sum eldur kom í seinnapartin fríggjadagin, tá skipið varð statt norðan fyri Føroyar, liggur enn í Havn.

Austurfrétt skrivar, at manningin kom til Íslands í gjár.

Men maskinmeistararnir eru eftir í Havn. 

Og skaðin í maskinrúminum var mettur í gjár.

Fólk frá reiðaríinum, Síldarvinsluni, og skaðanevndin komu til Havnar í gjár.

Barði skuldi fara at fiska svartkjaft 10. juli. Men so verður neyvan, tí umvælingin er mett at vara minst fýra vikur.

Hol á oljuslangu

Orsøkin til eldin er helst tann, at hol er komið á eina oljuslangu, so olja sprændi á maskinua.  

Brimil sleipaði Barð á Havnina.  

Manningin, sum bara var fimm mans hendan túrin, sløkti sjálv eldin. Eingin fólkaskaði var.

Eldurin gjørdi, at skipið misti streymin.

Barði var á veg til Íslands úr Føroyum, har hann júst hevði verið á beding, skrivar Austurfrétt.

Farið var í gjøgnum maskinuna.