Skemtari stillar upp ímóti Nigel Farage

Høvuðsmótvalevnið hjá Nigel Farage á komandi eykavalinum í Clacton on Sea verður væntandi skemtivalevnið Count Binface, skriva bretskir miðlar í dag.

Formaðurin í flokkinum Reform UK hevur sitið í parlamentinuma ein tíð. Men hann hevur verið undir trýsti orsakað av tveimum gølum um stuðul.

Fyrradagin boðaði hann frá, at hann leggur frá sær sum tingmaður. Soleiðis, sum enska valskipanin virkar, hevur tað við sær, at eitt annað tingfólk skal veljast. Tí verður eykaval í valdøminum Clacton on Sea.

Gáttin fyri at sleppa at stilla upp til parlamentið er lág. Tað krevur eitt depositum upp á 500 pund, og so undirskriftir frá 10 veljarum í valdøminum.

Bretar hava eisini eina eitt sindur serliga politiska mentan og ein eyðkendan serligan humor. Siðvenja er m.a. fyri skemtivalevnum.

Nigel Farage

Hevur stillað upp seks ferðir

Helst kendasta skemtivalevnið í bretskum politikki seinastu árini, er júst Count Binface, sum hevur stillað upp 6 ferðir síðan 2019.

Hann vísir seg í búna, sum sær út sum, at hann er brynjuklæddur, og hjálmurin líkist einum ruskílati. Tað er skemtarin, Jonathan David Harvey, sum spælir leiklutin sum Count Binface. Navnið kann umsetast sum Greivi Ruskílatsandlit.

Hann hevur boðað frá, at hann stillar upp á eykavalinum móti Nigel Farage.

Labour-flokkurin, Konservativi flokkurin, Liberaldemokratarnir, Grøni flokkur og Restore Britain hava boðað frá, at teir stilla ikki upp á eykavalinum. Og nú eru fólk farin at halda, at Count Binface hesa ferð hevur ein veruligan møguleika at vinna, og at verða valdur í parlamentið.

BBC skrivar, at Reform UK-flokkurin hevur latið neyðugu skjølini inn, og at valdagurin helst verður 13. august.