Spyr aftur løgmann um tænastuboðini

Løgmaður fær nú á triðja sinni fyrispurning frá Liljuni Veihe, løgtingskvinnu fyri Tjóðveldi, um málið um vatnið í Skálavík og tænastuboðini, sum Jacob Vestergaard, landsstýrismaður, gav Búnaðarstovuni.

Beinir Johannesen

Umsitingin hjá landsstýrismanninum tók tænastuboðini aftur, tí mett varð, at landsstýrismaðurin hevði ikki heimild at geva tey.

Jacob Vestergaard bað síðan Annfinn V. Hansen, advokat, gera eina løgfrøðiliga meting av heimildini.

Niðurstøðan hjá advokatinum var, at landsstýrismaðurin hevði heimild at geva tænastuboðini.

Jacob Vestergaard

Ørkymlandi svar

Liljan Veihe heldur, at svarið, sum hon áður hevur fingið frá landsstýrismanninum, er ørkymlandi. Hon vísir á, at umsitingin í Vinnumálaraðnum metir, at heimild er ikki at geva tænastuboð, samstundis sum landsstýrismaðurin sjálvur er komin til eina aðra niðurstøðu.

Hon vil tí hava løgmann at svara, hvat hann heldur um, at eitt landsstýrisfólk ætlar at geva somu tænastuboð aftur, hóast umsitingin hevur mett, at tey ikki hava heimild í lóg.

Liljan Veihe vísir á, at tað er løgmaður, sum hevur eftirlit við landsstýrisfólkunum, og at landsstýrisfólk hava skyldu at røkja sítt starv á fullgóðan og lógligan hátt:

Sí eisini: Jacob Vestergaard kolldømir egna umsiting