Løgmaður: Í lagi at spyrja advokat uttan fyri fyrisitingina

Tað var í lagi, at Jacob Vestergaard spurdi advokat uttan fyri fyrisitingina, um tað var rætt at geva Búnaðarstovuni tænastuboð.

Fyrisitingin segði, at tað var ikki í lagi.

Advokaturin segði, at tað var í lagi at geva tænastuboð.

Beinir Johannesen, løgmaður, hevur svarað Liljuni Weihe, løgtingskvinnu, um skylduna hjá løgmanni at hava eftirlit við landsstýrisfólkunum.

Liljan Weihe spurdi, um løgmaður heldur tað vera í lagi, at landsstýrismaðurin alment boðar frá, at hann er til reiðar at geva somu tænastuboð aftur, hóast fyrisitingin eftir neyva viðgerð hevur mett tey at vera óheimilað. 

Løgfrøðingar eru ymiskir á máli, um Jacob Vestergaard hevði nóg góða heimild at geva tænastuboðini. 

Jacob Vestergaard

Landsstýrisfólk hava evsta vald

Landsstýrisfólk hava evsta vald og eisini evstu ábyrgd á málsøkjum, sum løgmaður letur teimum at sita fyri, sigur Beinir Johannesen.

Landsstýrisfólkið ger tí av, hvørji løgfrøðilig ráð, tað brúkar.

Løgmanseftirlitið við landsstýrisfólki er yvirskipað, sigur løgmaður.

Í hesum førinum er ikki talan um eyðsýnt lógarbrot, sigur Beinir Johannesen.

Landsstýrisfólkið ivast í tulkingini hjá fyrisitingini og spyr advokat, sum ikki er samdur við fyrisitingini og metir, at tænastuboðini eru heimilað. 

Leggur løgmaður seg út í hesa meting, er hann í roynd og veru kærumyndugleiki fyri øllum  avgerðum hjá  landsstýrisfólkum.

Og tað er ikki ætlanin við stýrisskipanarlógini, sigur løgmaður.

Les alt svarið her.