Øll málini: Púra javnt millum Føroyar og Moldova

Tað stendur á jøvnum millum Føroyar og Moldova í innanhýsis uppgerðunum, sum hava verið fýra síðan 2021.

Báðir dystirnir í Chisinau eru endaðir við javnleiki, og londini hava vunnið hvør sín á Tórsvølli.

Í mars í 2021 spældu londini fyri fyrstu ferð ímóti hvørjum øðrum. Hetta var í HM-undankappingini, sum tey flestu kanska minnast best fyri góðu avrikini á heimavølli ímóti Danmark og Skotlandi.

Teir dystirnir góvu kortini eingi stig, men tað gjørdu teir ímóti Moldova. Í Chisinau javnaði Meinhard E. Olsen til 1-1 seint í dystinum, áðrenn Klæmint A. Olsen og Heini Vatnsdal tryggjaði Føroyum trý stig á Tórsvølli í 2-1 sigri.

Meinhard E. Olsen og Mads Boe Mikkelsen hava skotið føroysku málini í Chisinau, og Klæmint A. Olsen og Heini Vatnsdal hava skorað ímóti moldavum á Tórsvølli.

Nicolaescu argaði illa

Føroyar fingu góða byrjan uppá EM-undankappingina, tá Mads Boe Mikkelsen skoraði til 1-0 í fyrra hálvleiki á Zimbru-leikvøllinum í moldaviska høvuðsstaðnum 24. mars 2023.

Føroyingarnir mistu kortini taki eftir steðgin, og tað endaði við, at heimaliðið fekk brotsspark, sum vandamikli Ion Nicolaescu sendi í netið tríggjar minuttir fyri leiklok.

Á heimavølli hálvt ár seinni gekk uppaftur verri. Sami Ion Nicolaescu slapp avstað í kontraálop tíðliga í seinna hálvleiki, dróg framvið Odmari Færø og sendi innfyri til Vadim Rata, sum hevði lætt spæl inni undir málinum.

Sigurin hjá moldavum var ongantíð veruliga hóttur í ein lakum avrikið frá Føroyum, sum bert fekk tvey stig í hesi undankappingini. Hitt kom á útivølli ímóti Albania, sum longu hevði spælt seg til sítt annað EM-endaspæl.