Broytingar í skattalógini kosta 70 milliónir

Broytingarnar í skattalógini, sum eru komnar í løgtingið, kosta slakar 70 mió. kr.

Uppskotið hjá Fíggjarmálaráðnum sigur, at broytingarnar hava fíggjarligar avleiðingar fyri land, kommunur og sosialar grunnar.

Samdøgursfrádrátturin, sum fer úr 120 krónum upp í 210 krónur, kostar landi og kommunum eina til tvær milliónir.

Men kommunurnar fáa endurgoldið inntøkumissin frá landinum.

Uttanlandsfrádrátturin, sum skal hækka, fer at kosta 10 mió. kr. hjá landi og kommunum frá 2029. Eisini her fáa kommunurnar endurgoldið inntøkumissin frá landinum.

Uttanlandsfrádrátturin verður 84.000 kr. inntøkuárið 2027. Hann er 48.000 kr. í ár.

1.000 fólk fáa hendan frádráttin.

Frádráttur fyri limagjald

Frádrátturin fyri limagjald til fakfelag kostar landi, kommunum og sosialum grunnum millum 30 og 40 mió. kr., tá hann er komin fult í gildi í 2028.

Frádráttur skal latast fyri í mesta lagi 2.000 kr í fakfelagsgjaldi í 2027 og 4.000 kr. frá 2028.

Og gjaldið fyri 700.000 lønarflytingar fer at kosta eina millión, tí tann, sum flytur løn, skal nú gjalda fyri flytingina.

Hvør flyting kostar millum fýra og fimm krónur.

Skattafrádrátturin fyri sosial gjøld í Norðurlondum fer at kosta almennu kassunum 16 mió. kr., sigur Fíggjarmálaráðið.