Hava mist MSC-góðkenning - Havsbrún hevur framleitt niðurfyri

 Svartkjaftur kann ikki longur brúkast til alifóður.

Fiskiskapurin eftir svartkjafti hevur mist MSC-góðkenningina sum burðardyggur fiskiskapur, tí strandarlondini eru ikki samd um, hvussu kvoturnar skulu býtast.

Tað rakar einasta fóðurframleiðaran í Føroyum, Havsbrún í Fuglafirði, sum ikki kann brúka svartkjaftin sum góðkenda rávøru í síni framleiðslu av alifóðuri. 

Men Havsbrún hevur fyrireikað seg til støðuna. Virkið hevur framleitt niðurfyri, og hevur tí burðardygt, góðkent mjøl og lýsi á goymslu, sum kann brúkast eina tíð aftrat, sigur Odd Eliasen, stjóri á Havrbún.

Odd Eliasen

Fer goymslan at ganga undan, verður neyðugt finna aðrar loysnir.

Evropeiskir framleiðarar av fiskamjøli og lýsi halda ikki, at tað gevur meining, at fiskiskapurin missir burðardygga góðkenning, tá svartkjaftastovnurin hevur tað gott. 

Og nú tá strandarlondini ikki kunnu blíva samd um, hvussu fiskiskapurin eftir svartkjafti skal býtast, arbeiða virkini, sum gera mjøl og lýsi, millum annað Havsbrún, av øllum alvi við at fáa nýggja góðkenning um burðardygd.

Hoyr innslag í útvarpstíðindunum: