Makrelsamráðingarnar niðurlagdar

Strandarlandasamráðingar hava verið í London 15. - 17. januar og hava hildið fram seinastu dagarnar. Fiskeribladet Fiskaren skrivaði í síðstu viku, at norska stjórnin er ikki sinnað at geva íslendingum og føroyingum meira enn millum átta og tíggju prosent av kvotuni.

Maria Damanaki, ES-fiskivinnukommiserur, hevur fyrr skotið upp, at Føroyar fáa 11,9 prosent av kvotuni. Norra og Danmark vóru harðliga ímóti tilboðnum.

Umboð fyri uppsjóvarvinnuna har søgdu tá, at ES og Norra hava verið samd um eina kós, men Damanaki darvaði samráðingunum, nú hon av sínum eingtingum bjóðaði føroyingum størri part av makrelkvotuni, uttan at tosa við Norra fyrst.

Norra og ES ósamd

Føroyar vrakaðu tilboðið, tí tað var ov langt burtur frá teimum 15 prosentunum, sum føroyingar krevja. Jacob Vestergaard, landsstýrismaður í fiskivinnumálum, hevur kortini fyrr sagt, at líkindini fyri semju eru góð, tí partarnar flyta seg nærri hvør øðrum.

ES og Ísland eru samd um lutin hjá Íslandi í heildarkvotuni næsta ár. Men Norra og ES, sum annars hava verið viðspælarar undir samráðingunum, eru ikki samd um, hvussu stóran part av heildarkvotuni Ísland og Føroyar skulu hava.

Norra fer heldur ikki at taka undir við størri kvotu til Ísland og Føroyar, um tað ikki er greitt, hvussu nógv ár, avtalan varar.