»Eg hugsi um vandan at fara upp á Mount Everest«

<p>- Um tankin, at eg ikki komi heilskapaður aftur fyllir ov nógv, kundi eg tað sama latið vera við at fara. Eg má fyrireika meg uppá, at eg komi aftur, sigur Arne Vatnhamar við útvarpið.</p>

<p>Í løtuni situr hann heitt og fjálgt umborð á Qatar Airways QR160-flogfarinum við kós móti Kathmandu, har hann væntandi kemur klokkan 11:55 lokala tíð mánamorgunin.</p>

<p>Men, komandi vikurnar verða tó alt annað enn heitar og fjálgar fyri Arna Vatnhamar. Hann ætlar sær at verða fyrsti føroyingur, ið røkkur tindin á heimsins hægsta fjalli, har kuldin kemur niður í 40 kuldastig.</p>

<p><strong>Ætlar at Merki skal veittra á Mount Everest</strong></p>

<p>Samstundis sum 3.000 fólk hava eydnast upp á tindin á heimsins hægsta fjalli, er tað eisini ein sannroynd, at fleiri enn 200 fólk hava latið lív í royndini at koma sær upp á heimsins hægsta fjall. Hetta fær ikki Arna Vatnhamar at setast aftur.</p>

<p>- Eg havi verið og keypt mær eitt lítið Merki, sum eg gleði meg til at kunna veittra við og taka mynd av, tá eg standi á toppinum á Mount Everest, sigur Arne Vatnhamar í samrøðu við útvarpið.</p>

<p>Hósdagin, eftir tríggjar nætur á hotelli í Kathmandu, byrjar sjálv ferðin hjá Arna Vatnhamar upp á Mount Everest. Tú kanst fylgja ferðini hjá Arna Vatnhamar her: <strong><a href="https://www.facebook.com/pages/Vatnhamar-Adventures/208778035985677" target="_blank">Vatnhamar Adventures</a></strong> (letur upp í nýggjum kaga)</p>