Aftur grundlógaravhoyring

Í løtuni er grundlógaravhoyring í Føroya rætti í sambandi við, at ein fjórði maður seint í gjárkvøldið varð handtikin í málinum um ránið í Havn annað páskakvøld.

John Martin Olsen, økisleiðari á Politistøðini í Havn, sigur, at tað er ikki óhugsandi, at fleiri fólk verða tikin fyri at eiga lut í ráninum við BankNordik í Húsagøtu, tá pengar vórðu rændir frá eini kvinnu uttan fyri BankNordik.

Í gjárkvøldið var ein 20 ára gamal maður varðhaldsfongslaður í sama máli. Í grundlógaravhoyring í Føroya rætti játtaði hann at hava framt ránið starvsfólkinum í SMS, sum skuldi lata pengar í samdøgursboksina hjá bankanum.

Jens Severinsen, ákæri, kravdi 20 ára gamla mannin varðhaldsfongslaðan, so hann ikki hevur møguleika at ávirka vitni ella at seta seg í samband við onnur. Maðurin skal eisini persónkannast.

Tveir aðrir menn, sum løgreglan tók í gjár, vórðu lætnir leysir.

Maðurin, sum varð tikin í gjárkvøldið, og nú er í grundlógaravhoyring er 24 ára gamal.