Lætti hjá byggivinnuni

Í dag er vorðið lættari hjá byggivinnuni at fáa handverkarar til arbeiðis.

Broytingin í útlendingalógini, sum bæði løgtingið og fólkatingið samtyktu í vár, kemur í gildi í dag, 1.juli.

Nú kunnu handverkarar í ES-londum fáa uppihalds- og arbeiðsloyvi í Føroyum, so leingi arbeiðsloysið í Føroyum er undir seks prosentum. 

Gamla markið var hálvt fjórða prosent. Arbeiðsloysið í Føroyum er góð fýra prosent.

Lógarbroytingin er galdandi fyri byggivinnuna, ella sum ríkislógin sigur "bygge- og anlægsektoren."

Lógin er donsk, tí útlendingamál eru framvegis ikki yvirtikin. 

Vinnuhúsið metti í vár, at nú so nógv bygging er í Føroyum, er brúk fyri 150 til 200 handverkarum afturat.