Byggifelag meldað fyri óhapp

Arbeiðseftirlitið hevur biðið fútan geva byggifelagnum Búsetri bót fyri at bróta kunngerðina um trygd á arbeiðsplássum. 

Ein 31 ára gamal timburmaður hjá Búsetri fekk stóran skaða, tá hann fór gjøgnum eitt op í einari tekju tann 28.mars í ár. 

Trygdin á arbeiðsplássinum var ikki í lagi, er niðurstøðan hjá Arbeiðseftirlitinum.

Seinast, eitt slíkt mál varð sent fútanum, var fyri 13 árum síðani. Tá var bótin 20.000 kr. Arbeiðseftirlitið mælir til, at bótin, sum Búsetur skal fáa, eisini verður 20.000 kr.

Búsetur fekk ætlanina hjá Arbeiðseftirlitinum um at melda felagið til hoyringar.

Felagið svaraði, at tað hevur ikki brotið lóggávuna um arbeiðsumhvørvi.

Búsetur heitti, umvegis advokat, á Arbeiðseftirlitið um at umhugsa sína niðurstøðu av nýggjum.

Men Arbeiðseftirlitið broytti ikki støðu og hevur nú meldað Búsetur til fútan.