Vísitalið sigur bjartskygni

Føroyingar keypa meira, og eftirspurningurin eftir vørum og tænastum fer at vaksa.

Konjunkturvísitalið heldur fram at hækka, kunngjørdi Fíggjarmálaráðið í gjár. Tað er hækkað úr 23 upp í 37 í ár.

Vísitalið hevur ikki verið so høgt síðani í januar í 2007, tað er, áðrenn altjóða fíggjarkreppan byrjaði í 2008.   

Konjunkturkanningin hjá Fíggjarmálaráðnum varð gjørd í juni. 

24 mánaðir mettir

Konjunkturvísitalið gevur ábending um, hvussu brúkarar og vinnulív halda, støðan í búskapinum er beint nú, og hvussu tey meta, gongdin var farnu tólv mánaðirnar og útlitini eru fyri næstu tólv mánaðirnar.

Í juni hækkaði vísitalið fyri allar bólkar, sum eru við í kanningini hjá Fíggjarmálaráðnum, uttan í bólkinum tilfeingisvinnur. Har er vísitalið at kalla óbroytt.

Men bæði húsarhaldini og vinnulívið eru vorðin nógv bjartskygdari um framtíðina og vænta framgongd næsta árið, upplýsir Fíggjarmálaráðið. 

Fólk í húsarhaldunum, sum eru spurd, vænta eisini, at arbeiðsloysið fer at minka næsta árið.

Vísitalið hækkaði serliga fyri tænastuvinnurnar og byggivinnuna, sum merkja stóra framgongd í sølu og eftirspurningi. 

Byggivinnan og tilfeingisvinnurnar, so sum fiskivinnan, vænta at fáa brúk fyri fleiri fólkum til arbeiðis næstu tólv mánaðirnar.