Russar ætla at keypa meiri úr Føroyum

Innflutningsbannið kemur russisku innflytarunum dátt við, og teir eru nú farnir at kanna, hvaðani teir kunnu fáa vørur, sum vanliga verða innfluttar úr USA, ES og Noregi, skrivar IntraFish.

Sambært landbúnaðarmálaráðnum innflytir Russland umleið 460.000 tons av fiskavørum úr londum, sum nú verða rakt av innflutningsbanninum. Tað svarar til góð 13 prosent av tí, sum russar eta av fiski og fiskaúrdráttum. Noreg útflytir millum 300.000 og 350.000 tons av fiskavørum til Russlands um árið, meginparturin er sild, laksur og síl. 

Drúgv tíð at finna marknaðir

Sergei Gudkov, forstjóri í fyritøkuni Fish Union, sum umboðar innflytarar og matvøruvirki í Russlandi, sigur við Intrafish, at tað fer at taka drúgva tíð at fáa vørur frá øðrum innflytarum. Hann sigur, at tað ber til at keypa sild úr Føroyum, nú Noreg verður boykottað, og møguleikar eru eisini at økja laksaalingina í Russlandi. Men tað verður torført at innflyta surimi, sum verður gjørt úr upsa, sigur hann.

Sergei Dankvert, stjóri í russiska matvørueftirlitinum, hevur havt fundir við sendiharrar í suðuramerikanskum londum, og teirra góvu lyfti um, at Russland kann keypa meiri frá teimum. M.a. hevur Kili játtað at tví- ella trífalda útflutningin av fiskavørum til Russlands, og útflutningurin av  skeljadýrum verður eisini fleirfaldaður.

Í fjør útflutti Kili 53.000 tons av fiskavørum til Russlands, og útflutningurin av skeljadýrum veksur úr 3.000 tonsum upp í 15.000-20.000 tons.