Troyggja frá Guðrun&Guðrun aftur í "Brotsgerðini"

Troyggjan, sum Guðrun&Guðrun hava sniðgivið, er vorðin ímyndin av donsku spenningsrøðini "Brotsgerðini."

Tá farið varð undir upptøkurnar av nýggjum pørtum av spenningsrøðini, var ongantíð nakar ivi um, at Sofie Gråbøl, sum hevur høvuðsleiklutin sum Sarah Lund í "Brotsgerðini," aftur skuldi vera í eini troyggju frá Guðun&Guðrun.

Tað váttar Guðrun Rógvadóttir, sum er annar stjórin í klædnafyritøkuni. Men um kenda løgreglukvinnan aftur hesaferð er í einari stjørnutroyggju, vil hon ikki avdúka.

"Brotsgerðin" er eisini sera væl umtókt spenningsrøð í Bretlandi, og millum trúgvastu hyggjararnar er Camilla, hertoginna av Cornwall, sum er gift Charles prinsi av Wales.

Tey hava verið í Danmark á vitjan seinastu dagarnar, og eitt av ynskjunum hjá Camillu var at síggja staðið, har upptøkurnar til Forbrydelsen verða gjørdar.

Tað fekk hon sjálvandi eftirlíkað, og í hesum sambandi handaði Mary krúnprinsessa í dag Camillu eina stjørnutroyggju, sum Guðrun&Guðrun hava sniðgivið.

Nýggju partarnir av "Brotsgerðini" verða sendir í heyst.