Vesi í miðbýnum: - Hetta kunnu vit ikki bjóða fólki

Um tú skalt á vesi, meðan tú gert tíni ørindi í miðbýnum í Havn, so mást tú halda tær, til tú ert komin oman í Sandagerð. 

Eingi tøk almenn vesi eru nevniliga í miðbýnum í Havn, og tað heldur Tróndur Sigurðsson, býráðslimur, ikki, at kommunan kann bjóða fólki.

Fólk á gøtuni eru samd

Hesum er Vera Bjørgvin samd við. Hana hittu vit á gøtuni í Havn, og hon heldur hvørki, at hetta er nakað, mann eigur at bjóða føroyingum ella ferðafólki. 

Sambært grein í Dimmu sigur Elsa Berg, borgarstjóri í Tórshavnar kommunu, at løgreglan staðiliga hevur heitt á býráðið at steingja almennu vesini um kvøldarnar og næturnar, tí tey verða brúkt til at keypa, selja og nýta rúsevni. Tá vit vóru á staðnum tíðliga seinnapartin, var tó eisini stongt.

Vit hava spurt, um politiið kann vátta hesa útsøgn, men hetta fær politiið ikki givið svar um í dag.

Ikki trupult at finna eina loysn

Men ein loysn eigur ikki at vera trupul at finna, spyrt tú Trónd Sigurðsson. 

Til dømis kann trygdin, sambært honum, styrkjast við vaktarhaldi á staðnum. 

Spurdur um, hvussu nógv kommunan kann brúka upp á hetta, er svarið, at vit noyðast at brúka tað, sum krevst og er neyðugt fyri at fáa skil á støðuna.

Vit ætlaðu at spyrja Elsu Berg, borgarstjóra í Tórshavnar kommunu, um hvussu hon ætlar at loysa støðuna. Men tað eydnaðist okkum ikki at fáa fatur í borgarstjóranum í dag.