Leysir hundar verða eisini forbodnir í Runavík

Hundar í Runavíkar kommunu skulu nú eisini vera í bandi.

Ein kunngerð um tað er á veg. Hon var fyri á landsstýrisfundi í gjár. 

Runavíkar kommuna hevur heitt á Vinnumálaráðið um at seta í gildi fyri kommununa kunngerð um skyldu at hava hund í bandi. 

Kunngerðin um skyldu at hava hund í bandi hevur higartil bara verið galdandi fyri Tórshavnar kommunu og Klaksvíkar kommunu.

Nakrir undantiknir 

Í Klaksvíkar kommunu eru hundarnir í Árnafirði, Mikladal, Trøllanesi og Svínoy tó undantiknir bandinum.  

Kunngerðin áleggur fólki, sum hava hund, at hava hundin í bandi á gøtu, vegi, breyt ella øðrum øki, sum eru opin fyri vanligari ferðslu.

Bandið skal vera so stutt, at tann, sum leiðir hundin, hevur hundin tætt inni at sær. 

Tey, sum ikki halda boðini í kunngerðini, kunnu fáa bót.