Grein um CTD í altjóða tíðarriti

Nýggj grein um CTD er almannakunngjørd í altjóða vísindaliga tíðarritinum JIMD Reports. 

Millum høvundarnar er Jan Rasmussen, lækni á medisinska deplinum á Landssjúkrahúsinum, skrivar Granskingarráðið á heimasíðuni. 

Í greinini verður greitt frá, hvussu karnitin virðini falla í vødda, blóði og landi hjá sjúklingum við ringum slagi av CTD, tá dagliga karnitin ískoyti verður steðgað.

Umráðandi at taka heilivágin

Kanningin vísti, at fría karnitinið í blóði fellur niður í helvt longu 5-9 tímar aftaná seinastu inntøku av karnitintablettum. Tískil er umráðandi hjá sjúklingunum at taka karnitin regluliga í minsta lagi tríggjar ferðir um dagin. 

Eisini varð staðfest, at innihaldið av karnitini í vøddunum er sera lítið hjá sjúklingunum, hóast teir taka stórar nøgdir av karnitini dagliga.

Kanningin varð gjørd á Landssjúkrahúsinum, og onnur úrslit frá kanningunum verða almannakunngjørd í komandi greinum.