Handaðu borgarstjóranum undirskriftirnar

Stigtakarnir, ið vilja verðveita økið við Skansan sum tað er, handaðu í gjár Heðini Mortensen, borgarstjóra í Havn, 630 undirskriftir

Stigtakararnir handaðu mikudagin borgarastjóranum í Havn 630 undirskriftir. Tað eru fólk, ið mótmæla at sonevnda Skansabryggjan verður gjørd útifyri Skansan

Mynd: Grækaris D. Magnussen

Jákup Bogi Joensen

Bjarni Mohr

02.04.2015 - 09:10

Seinnapartin í gjár fekk Heðin Mortensen, borgarstjóri í Tórshavnar kommunu, handað 630 undirskriftir frá borgarum, sum mótmæla ætlaðu havnaútbyggingini uttan fyri Skansan í Havn.

Tað eru Øssur Winthereig og Grækaris Djurhuus Magnussen, sum hava tikið stig til undirskriftainnsavningina á sosiala miðlinum Facebook, har eisini 1.593 fólk hava givið til kennar, at tey stuðla mótmælinum.

Vinnunevndin fær undirskriftirnar

- Hesi fólkini, sum hava skrivað undir, heita á kommununa um at bíða. Tí vit eiga at hugsa okkum væl um, sigur Øssur Winthereig við heimasíðuna hjá Tórshavnar kommunu.

Undirskriftirnar verða nú latnar vinnunevndini í Tórshavnar býráð, sum fer at viðgera spurningin í næstum.

Ætlanin um Skansaútbyggingina hevur ligið frammi til almenna hoyring, og okkurt um 300 fólk møttu eisini upp á borgarafundi fyri viku síðani, har málið varð viðgjørt.