Revsimál útsett í nakrar vikur

Revsimálið móti einum 54 ára gomlum manni, sum er ákærdur fyri aðra kynsliga framferð enn samlegu móti tveimum dreingjum, sum tá teir vóru ávikavist 16 og 17 ára gamlir, er útsett í nakrar vikur.

Orsøkin er, at verjin hjá manninum bað um at fáa mannin persónkannaðan, og tað játtaði rætturin.

Ofta er neyðugt í revsimálum at fáa ákærd persónkannað fyri at vita, hvør dómur er hóskandi, um eitt nú talan kann blíva um treytaðan dóm ella samfelagstænastu. 

Kriminalforsorgin kannar

Ein persónkanning lýsir persónligu viðurskiftini hjá ákærda, so sum útbúgving, arbeiði, frítíðarítriv, heilsustøðu og, um tey eru gift og eiga børn.Kriminalforsorgin ger slíkar persónkanningar. 

Føroya rættur viðgjørdi málið um kynsliga ágangin týsdagin. Tá vórðu ákærdi maðurin, menninir, sum hann er ákærdur fyri at hava gjørt seg inn á, og tvey onnur vitni avhoyrd.

Fyrr er eitt vitni afturat avhoyrt um málið. 

Ikki endurgevast alment

Rætturin avgjørdi, at ikki er loyvt at endurgeva alment tað, sum varð sagt á rættarfundinum.

Politiið fekk fráboðan um málið nakað eftir ólavsøku í fjør. Ákærdi maðurin noktar seg sekan í øllum ákærunum.

Hjásetin hjá teimum báðum ungu monnunum, sum eru brøður, kravdi endurgjald fyri tort, 40.000 kr. fyri hvønn.