Vitjar kortini ikki nú: Drotningavitjanin útsett

Løgmaður og kongshúsið hava gjørt av at útseta drotningavitjanina, sum skuldi verða í komandi viku, boðar Løgmansskrivstovan frá

Vitjanin hjá Margrethu drotning, ið annars skuldi vera í næstu viku, er útsett, boðar Løgmansskrivstovan frá

Bjarni Mohr

10.06.2015 - 13:33

- Vit høvdu væntað, at tað bar til at skipa fyri fólkatingsvali og drotningavitjan samstundis. Tað er nú nógv, ið bendir á, at tað ikki letur seg gera. Fyri at tryggja ta virðing, sum sømir seg einari drotningavitjan, verður vitjanin tískil útsett, sigur løgmaður.

- Tað harmar meg, tí kring alt landið hava nógv fólk kýtt seg fyri at tryggja drotningahjúnunum eina sømiliga vitjan, sigur Kaj Leo Holm Johannesen, løgmaður.

Løgmansskrivstovan hevur í dag kunnað avvarðandi partar, sum hava verið við til at fyrireika vitjanina. Nær drotningahjúnini so koma til Føroya, er ikki greitt enn, sigur Løgmansskrivstovan í fráboðan á heimasíðuni.