- Tíðindi, mentan og ítróttur
Havstovan: Allir óbrúktir dagar strikast
![](https://kvf.fo/sites/default/files/styles/grein-ovasta-mynd/public/3b9644ee3258d6a7ea07fa5a18e258f5.png?itok=8FdgatBs)
Allir óbrúktir fiskidagar skulu strikast og síðani harafturat helvtin av teimum døgum, sum tá eru eftir hjá teimum, sum fiska tosk og hýsu.
Havstovan tekur rívan til í tilmæli sínum til landsstýrismannin í fiskivinnumálum um fiskidagarnar næsta fiskiár, sum byrjar 1.september.
Men veiðitrýstið á upsan er ikki ov stórt, sambært Havstovuni.
Um nakrar dagar kemur so tilmælið frá Fiskidaganevndini um fiskidagarnar.
Í Fiskidaganevndini eru feløgini hjá skipum og bátum, sum hava fiskidagar, og Fiskimannafelagið.
Landsstýrismaðurin ger uppskot
Landsstýrismaðurin ger síðani eitt uppskot um broytingar í lógini um vinnuligan fiskiskap, sum hann leggur fyri løgtingið á ólavsøku.
Og í seinasta lagi 18.august skal løgtingið hava avgjørt, hvussu nógvar fiskidagar, flotin fær í fiskiárinum 2015-2016.
Samanumtikið var triði hvør fiskidagur eftir, tá fiskiárið 2013-2014 endaði.
Løgtingið samtykti, at fiskidagatalið í fiskiárinum, sum byrjaði 1.september í fjør, er tað sama sum í undanfarna fiskiári.