Stjórn við bara Vinstra

Lars Løkke Rasmussen hevur boðað frá, at einki spurdist burtur úr stjórnarsamráðingunum við hinar borgarligu flokkarnar, og Vinstri fer einsamallur í stjórn.

- Eg haldi, at tað er undirtøka í Fólkatinginum fyri, at vit í Vinstra skipa stjórn, sigur Lars Løkke Rasmussen við danskar miðlar.

Hann verður sostatt forsætisráðharri í einari stjórn, sum skal hava undirtøku frá øðrum flokkum í øllum málum. Danski Fólkaflokkurin, Liberal Alliance og Tey Konservativu verða stuðulsflokkar.

Vinstri leggur nú seinastu hond á stjórnarskjalið, sum ætlandi verður liðugt um vikuskiftið. Danskir miðlar siga seg vita, at stjórnin fer  millum annað at lækka toppskattin.

Minnilutastjórnin við Vinstra hevur 34 fólkatingsesssir.