Tryggingin tekur við

Tryggingin, sum er teknað fyri verkætlanina Marknagilsdepilin, hevur boðað frá, at útreiðslurnar, sum standast av, at arbeiðið er seinkað nakrar mánaðir, koma undir tryggingina. Men tryggingin hevur, sum tryggingar plaga at hava, ymisk fyrivarni.

Í desember í fjør varð staðfest, at ein ráðgevi hjá heildarráðgevanum, BIG, Bjarke Ingels Group, hevði roknað skeivt viðvíkjandi trappurúmum úr betongi.

Roknivillan hjá ráðgevanum Lemming og Eriksson varð staðfest í desember. Arbeiðið at stoypa betongtrappurúmini lá stilt til í mars. Enn er ikki greitt, hvussu nógv roknivillan fer at kosta samanumtikið.

Tryggingin hevur síni fyrivarni

Ewald Kjølbro, stjóri á Landsverki, sigur, at Landsverk hevur fingið at vita, at tryggingin hjá verkætlanini tekur við, men tryggingin hevur síni fyrivarni.

Ein annar møguleiki er at fara eftir virkistryggingunum hjá BIG og undirveitaranum hjá BIG, Lemming og Eriksson.

Marknagilsdepilin skuldi vera liðugur, tá skúlaárið 2016 byrjar 1. august. Nú sigur tíðarætlanin, at hann verður liðugur 24. november næsta ár.