Hann sleppur ikki í Løgtingið

Klaksvíkar býráð noktaði á eykabýráðsfundi í gjárkvøldið at geva borgarstjóranum loyvi til at røkja bæði størvini. Bara tríggjar atkvøður vóru fyri. Átta atkvøddu ímóti.

Eftir fundin kunngjørdi Jógvan Skorheim, at hann heldur fram sum borgarstjóri. Tí kemur Bárður Kass Nielsen, sum er nummar trý á listanum hjá Nýggjum sjálvstýri, í løgtingið.

Bárður Kass Nielsen fekk 69 atkvøður á løgtingsvalinum 1. september. Tiltaksmaður hjá báðum tingmonnunum hjá Nýggjum sjálvstýri er Bjørn á Heygum, sum fekk 57 atkvøður.

Borgarstjórin í Runavík gevst á nýggjárinum

Býráðið í Runavík samtykti einmælt í gjár at loyva borgarstjóranum, Magnusi Rasmussen, at vera bæði borgarstjóri og tingmaður til 1. januar 2016.

Magnus Rasmussen, sum er valdur fyri Sambandsflokkin, boðaði frá dagin eftir valið, at hann gevst sum borgarstjóri á nýggjárinum.

SÍ EISINI Hann sleppur eisini í Løgtingið

Fríggjadagin samtykti Tórshavnar býráð, at Heðin Mortensen kann vera bæði borgarstjóri og løgtingsmaður.

Býráðið á Tvøroyri hevur ikki enn viðgjørt spurningin, um Kristin Michelsen, borgarstjóri, kann vera bæði borgarstjóri og tingmaður. Tað var hann í farna valskeiði.