BankNordik selur Vørð

Eitt oyra ella bæði tvey eru á veg frá BankNordik til landskassan. Tí tey, sum eiga Bank Nordik, kunnu vænta sær 100 milliónir krónur í eyka vinningsbýti í 2017.

BankNordik hevur gjørt treytaða søluavtalu við íslendska Arion banka um 51 prosent av partabrøvunum í tryggingarfelagnum Vørður.

Partabrøvini seld fyri 278 milliónir

Vørður er dóttirfelag hjá BankNordik í Íslandi. Harafturat hava BankNordik og Arion banki gjørt avtalu um, at Arion banki kann keypa tað, ið eftir er av Vørði, í 2017.

Samlaði prísurin fyri øll partabrøvini er umleið 278 milliónir danskar krónur. Báðar avtalurnar eru treytaðar av, at íslendsku myndugleikarnir góðkenna tær.

Partabrøvini hjá BankNordik í Vørði eru bókaðar til 174 milliónir, og eftir kostnaðir og skatt væntar bankin at fáa eini 60 milliónir krónur í vinningi av søluni.

Eigararnir mugu bíða í tolni

Bankin hevur áður boðað frá, at ætlanin er at lata upphæddina, sum samsvarar við økingina í kjarnukapitalinum av hesum handlinum, í vinningsbýti til eigararnar.

Tann upphæddin verður í minsta lagi 100 milliónir krónur, sigur bankin í fráboðanini. Tó mugu eigararnir bíða í tolni til 2017 at fáa hesar 100 milliónirnar, tí seinni partur av søluavtaluni við Arion banka ikki verður framd í verki fyrr enn tá.

Tað almenna í Føroyum eigur ein triðing av BankNordik, og tí kann landskassin vænta at fáa góðar 33 milliónir krónur í eyka vinningsbýti av hesum handlinum í 2017.