Landsstýrið viðgerð fíggjarlógina

Landsstýrið hevur í dag umrøtt uppskotið til fíggjarlóg, og hvørjar broytingar skulu gerast í sambani við fíggjarlógina.

Viðgerðin er ikki liðug, og tí ber ikki til at fáa nakað at vita um viðgerðina.

Undan fundinum í dag segði Kristina Háfoss, landsstýriskvinna í fíggjarmálum, at enn er tað bert landsstýrið sum umrøður fíggjarlógina og ætlaðu broytingarnar, og tí kann hon ikki siga nakað í løtuni.

Tá landsstýrið er liðugt við sína viðgerð, verður fíggjarlógin og ætlaðu bvroytingarnar umrøddar í samgonguni. Tí verður neyvan nakað alment at frætta fyrr enn um eina viku, sigur hon.

Sambært árskalendaranum hjá løgtinginum er seinasti framløgudagur mikudagin í næstu viku.

Ruth Vang, forkvinna í fíggjarnevndini hevur sagt, at onnur viðgerð av uppskotinum til fíggjarlóg verður um hálvan november.

Kristina Háfoss, landsstýriskvinna hevur fyrr sagt, at allar broytingar verða tøkar til aðru viðgerð av uppskotinum til fíggjarlóg, og at onnur viðgerð verður at meta sum fyrsta viðgerð av uppskotinum.