Íslendska kvotan býtt

Í fjør fingu 200 snellubátar makrelkvotu, men bara stívliga fjórðingur teirra fiskaði makrel. Fiskifréttir skriva, at 80 ísfiskaskip, tað er annað hvørt skip, hava longu latið øðrum rættin at fiska makrel í ár.

Íslendska makrelkvotan er 152.000 tons í ár. Harafturat eru góð 14.000 tons, sum lupu av í fjør. 320 skip og bátar sleppa at fiska kvotuna. Íslendska makrelveiðan er byrjað, og okkurt nótaskip hevur landað.

Ísland er ikki við í semjuni millum hini strandarlondini um, hvussu heildarkvotan skal býtast millum londini, og ásetur sær sína egnu makrelkvotu.