Dómur fallin í máli um barnaporno

Ein 63 ára gamal maður er í dag dømdur eitt ár og tríggjar mánaða treytaleysa fongsulsrevsing fyri at hava og fyri at breiða út barnaporno.

Maðurin hevur játtað seg sekan í at hava havt barnaporno á telduni, men hann noktar seg sekan í at hava latið øðrum barnapornografiskt tilfar.

Tann dømdi skal rinda sakarkostnaðin, og fýra harðdiskar og tríggjar teldur hjá manninum eru drignar inn. Ákærin kravdi minst hálvt annað ár.

Kann skjótast inn fyri Landsrættin

Verjin hjá manninum helt, at fýra ella fimm mánaðir treytaðir var nóg mikið fyri at hava barnaporno.

Varð maðurin funnin sekur í eisini at lata øðrum barnaporno, vóru seks ella sjey mánaðir ivaleyst, eisini treytaðir, segði verjin.

Føroya rættur sigur 15 mánaðir, treytaleysir. Dómurin kann skjótast inn fyri Landsrættin.