Ov fá foreldur í skúlastýrum

Fleiri foreldur eiga at vera í skúlastýrunum hjá stóru skúlunum, tí trý foreldur eru ov lítið, tá fleiri hundrað næmingar eru í skúlanum. 

Í Danmark eru fleiri foreldraumboð í stóru skúlunum og í skúlum, sum hava fleiri deildir. 

Hetta er eitt uppskot, sum varð frammi á evnisdegnum hjá nýggju skúlastýrunum. 

Heim og skúli og Mentamálaráðið skipaðu fyri evnisdegnum leygardagin. 100 fólk vóru við.  

Eitt annað uppskot, sum hevur verið frammi fyrr, er at geva skúlastýrislimunum samsýning.

Sambært heimasíðuni hjá Heimi og skúla er heitt á Mentamálaráðið um at fáa hetta í lag. Ætlanin er eisini at tosa við Kommunufelagið um spurningin.