Sáttmáli skal bøta um læknatrotið

Tað verður lættari at fáa serlæknar at koma til Føroya at arbeiða og fáa teir at støðast her, sigur Fíggjarmálaráðið, nú sáttmáli er gjørdur við Serlæknafelagið.

Nýggi sáttmálin við Serlæknafelagið er eitt veruligt frambrot. Hetta er fyrstu ferð, at Fíggjarmálaráðið og felagið hjá serlæknunum gera ein sáttmála.

Landsstýriskvinnan góðar vónir

Sáttmálin tryggjar, at Føroyar gerast kappingarførar, tá ræður um at fáa fleiri læknar í Føroyum. 

- Vit hava í nógv ár havt eina ósmidliga og ótíðarhóskandi skipan, sum ikki í nóg stóran mun hevur kveikt hugin hjá serlæknum at flyta til Føroya.

- Eg vænti, at nýggi sáttmálin fer at gera tað lættari at fáa fleiri serlæknar til Føroya, sigur Kristina Háfoss, landsstýriskvinna í fíggjarmálum.

Ikki longur tænastumenn

Fleiri grundleggjandi broytingar eru gjørdar í sáttmálaviðurskiftunum millum Fíggjarmálaráðið og Serlæknafelagið.

Eitt nú verða serlæknar ikki longur settir sum tænastumenn. Eisini landsstýriskvinnan í heilsumálum fegnast um sáttmálan.

- Eg bæði vóni og vænti, at nýggi sáttmálin við Serlæknafelagið er eitt týðandi fet rætta vegin, sigur Sirið Stenberg, landsstýriskvinna.