Michelin-stjørna mettar hinar matstovurnar

Michelin-stjørnan hjá KOKS er ein gyltur møguleiki hjá øðrum matstovum í Føroyum, sum fara at kenna ágóðan av, at KOKS hevur fingið eina Michelin-stjørnu.

Tað siga bæði Johannes Jensen, stjóri á KOKS, sum mikudagin fekk eina av høgt mettu Michelin-stjørnunum, og Guðrið Højgaard, stjóri á Visit Faroe Islands.

SÍ EISINI Bíleggingar fyri eina millión

Fyri hvørja ferð, eitt ferðafólk etur á matstovuni, KOKS, eta tey eisini á fleiri øðrum matstovum í Føroyum, sigur Johannes Jensen, stjóri á KOKS, við útvarpið.

KOKS er ein lítil matstova við eini 20 plássum. Tí verður bíðilistin helst langur, nú matstovan hevur fingið viðurkenda dygdarstemplið frá Michelin. 

Byggja nýggja matstovu

Hinvegin gevur viðurkenningin av KOKS eisini møguleika hjá øðrum at bjóða seg fram, sigur Guðrið Højgaard, stjóri á Visit Faroe Islands.

Matstovan KOKS hevur, sum er, ikki opið nú um veturin, men letur uppaftur 11. apríl. Í løtuni heldur KOKS til í sethúsum í Kirkjubø.

Men farið verður at byggja eina nýggja matstovu í Kerjum, framman fyri Hotel Føroyar, og hon skal standa liðug í 2018.