2016 royndist illa

Partafelagið Gist & Vist hevði lakari úrslit í fjør. Tað vísir grannskoðaði ársroknskapurin fyri 2016. Partafelagið Gist & Vist rekur millum annað Hotel Føroyar, Hotel Tórshavn, Hotel Vágar og matstovur í Havn. 

Ársúrslitið fyri skatt varð góðar 1,7 milliónir krónur fyri skatt. Sostatt munandi verri enn árið fyri, tá úrslitið fyri skatt varð 6,5 milliónir krónur, skrivar felagið í tíðindaskrivi.

Góð útlit fyri 2017

Eginpeningurin hjá felagnum er 19,6 milliónir krónur. Laka úrslitið kemst í høvuðsheitum av, at talið av gistingum á gistingarhúsunum hjá partafelagnum í fjør var lægri enn í 2015. 

Harumframt hevur vánaligt veður á festivalum í fjør ávirkað úrslitið skeiva vegin. Men leiðslan í Gist & Vist metir, at útlitini fyri 2017 eru rímiliga góð. 

Gist & Vist eigur fýra gistingarhús og rekur 12 matstovur. Í 2016 rindaði Gist & Vist 48 milliónir krónur í lønum og gjørdi nýíløgur fyri 28,5 milliónir krónur, skrivar felagið í tíðindaskrivi.