Kunnu ikki útihýsast

Tað sigur Løgtingsskrivstovan, sum staðiliga mælir til, at uppskotið hjá samgonguni um fiskivinnunýskipan verður broytt. Løgtingsskrivstovan hevur gjørt Vinnunevndini upprit um útlendskan ognarskap.

Har er niðurstøðan, at íslendskir íleggjarar, sum í dag hava vinnulig áhugamál í fiskivinnuni sambært lógini um vinnuligan fiskiskap, kunnu halda fram við somu avmarking, sum er galdandi í dag, eftir at fiskivinnunýskipanin er komin í gildi. Í dag er avmarkingin 33 prosent.

Eingin forðing í stýrisskipanarlógini

Løgfrøðingar hjá Løgtinginum siga, at ávísar lógargreinar viðvíkjandi útlendskum ognarskapi í lógaruppskotinum hjá Høgna Hoydal, landsstýrismanni, allarhelst eru í ósamsvari við millumtjóða sáttmálan, sum eitur Hoyvíkssáttmálin.

Tey siga tó eisini, at einki er í stýrisskipanarlógini, sum forðar Løgtinginum at samtykkja eina lóg, har útlendskur eigaraskapur í fiskivinnuni verður avmarkaður.

Tey mæla heldur ikki formansskapinum í Løgtinginum til at vísa burtur lógaruppskotinum hjá Høgna Hoydal. Men so leingi Hoyvíkssáttmálin er galdandi, hava íslendingar ávís rættindi í Føroyum, so sum at hava pengar í føroysku fiskivinnuni.