Norðhavið selt aftur til Kollafjarðar

Uppsjóvarskipið Norðhavið er selt aftur Kollafjarðar.

Ocean Group Faroes í Vági keypti síðst í mai Norðhavið at fiska burtur av felags svartkjaftakvotuni.

Ocean Group Faroes hevði veiðiloyvi, sum varð flutt til Norðhavið.

Skipið varð tá keypt fyri 40,5 mió.kr. Nú er tað selt aftur fyri 39,5 mió. kr.

Northwest Pelagic í Kollafirði átti Norðhavið, sum kallaðist Atlantsfarið, meðan skipið var skrásett í Miðvági.

Fekk ikki veiðiloyvi

Northwest Pelagic í Kollafirði fekk ikki veiðiloyvi, tí eigaraviðurskiftini vóru ikki í lagi, sambært Fiskimálaráðnum.

Fiskimálaráðið sigur, at føroyingar høvdu ikki ræðið á skipinum. 

Northwest Pelagic leyk ikki treytirnar í lógini um vinnuligan fiskiskap um útlendskan kapital og føroyskan ræðisrætt.

Norðhavið fiskaði 1.088 tons av felagskvotuni av svartkjafti.