Fiskimálaráðharrar hittast í Føroyum næsta ár

Næsta ráðstevna hjá fiskimálaráðharrunum í londunum í Norðuratlantshavi verður í Føroyum næsta ár.

Ráðstevnan í ár hevur júst verið í Shediac í Kanada. Hon endaði í gjár. 

Á ráðstevnuni vóru ráðharrar og landsstýrismenn úr Kanada, ES, Íslandi, Russlandi, Noreg, Føroyum og Grønlandi.

Viðbreknar havleiðir

Høvuðsevnið á ráðstevnuni í ár var, hvussu lond seta í verk ætlanir um at verja viðbreknar havleiðir.

Í sambandi við ráðstevnuna hevði Høgni Hoydal, landsstýrismaður, fundir við allar ráðharrarnar og landsstýrismannin í Grønlandi hvør sær.

Sambært Fiskimálaráðnum lovaðu tey at halda fram við vísindaliga samstarvinum landanna millum og menna tað.